Mat 17 | MEU | STEP | Dina tauratoi vada ela, Iesu ese Petro bona Iakobo bona tadina Ioane e abidia hidi, ororo badana ta ai e hakaudia dara.

Matthew 17

Iesu oromana eha idau

1 Dina tauratoi vada ela, Iesu ese Petro bona Iakobo bona tadina Ioane e abidia hidi, ororo badana ta ai e hakaudia dara. 2 Bena idia vairadiai ia vairana e idau, e hururu-hururu dina na heto, ena dabua danu e kuroka-kuroka diari na heto. 3 Bena Mose bona Elia na idia vairadiai e hedinarai, Iesu ida e hereva-hereva. 4 Bena Petro ese Iesu e hereva henia, eto, Lohiabada e, ita iniseni ai ta nohomu be namo herea: boma ura, kalaga autoi bama kara, auta oiemu, auta Mose ena, auta Elia ena. 5 Ia dounu e herevava ai; ori kiama-kiamana ta ese e ḡovadia ahu, bona ere ta ori lalona amo ema, eto, Natugu binai, egu lalokau; lau ia na lalo namo heniamu: ia erena ba kamonai. 6 Hahediba na e kamonai bena e goru goru diho, e gari dikadika dainai. 7 A Iesu na dekedia ela, e daudia toho, eto, A tore tore isi; asio gari. 8 Bena idia na e gaga isi, to ta asie itaia, Iesu sibona.

9 Ororo amo e hekeiva ai, Iesu ese e tamanudia, eto, O ita ḡaudia na tau ta basio hamaoroa ela bona Taunimanima Natuna na mase amo baine tore isi lou. 10 Bena ena hahediba ese e nanadaia, eto, Badina be dahaka itorena taudia e tomamu Elia do bainema guna. 11 Ia na e haere, eto, Momokani, Elia na e mai gunamu, ḡau iboudiai ihamatamatadia. 12 A na hamaoromuimu, Elia na vada ema, to idia na asi dibadia ia, bena edia ura karadia na ienai vada e kara vaitani. Taunimanima Natuna danu unu bae hahisia toma. 13 Bena ena hahediba lalodia e parara, ia ese Ioane Bapatiso herevana e gwauraia.

Iesu ese gorere merona e hamauria

14 Aru taudia dekediai e kau, bena tau ta dekena ela, tuina e hadai, eto, 15 Lohiabada e, natugu ame bogaia hisi; badina be ia na kava, bona ena gorere e badamu; nega momo Iahi ai e pau kaumu, bona nega momo lahi ai e pau kaumu, bona nega momo ranu ai e morumu. 16 Emu hahediba dekedia na mailaia, to idia na ihanamona asi dibadia. 17 Iesu na e haere, eto, Taia-kudima bona gwau-edeede uruna o! Lau na dekemui ai baina noho ela bona edena nega ai? Baina haheauka henimui ela bona edena nega ai? Dekegu a mailaia. 18 Iesu ese lauma dikana e gwau henia, bena lauma dikana e raka lasi; una negana ai mero vada e namo.

19 Gabeamo hahediba na Iesu dekena ela, e nanadaia hehuni, eto, Badina be dahaka ai ese ilulu-ohona na asia heḡereḡere? 20 Ia eto, Emui abidadama maraḡi-maraḡi dainai. Na hamaoromui momokanimu, emui abidadama bema sinapi nadinadina mo na heto, ina ororo boma haduaia, boma toma “Ini amo unu baola”, bena bema lao; kara iboudiai danu boma kara diba. 21 Ḡau tamona, ḡau inihetomadia ilulu-ohodia na dala ta lasi, ḡuriḡuri bona anivaga mo.

Galilea ai

22 Idia na Galilea ai e nohova ai, Iesu ese e hamaorodia, eto, Taunimanima Natuna na taunimanima ediai taona bae torea, 23 bae alaia mase; dina ihatoina ai do baine tore isi lou. Bena lalodia na e hisihisi bada.

24 Idia na Kaperanaum ai e lasi, bena Dubu Helaḡa monina igogona tauna Petro dekena ela, e nanadaia, eto, Emui hahediba tauna dubu monina e henimu eiava lasi? 25 Bena Petro e haere, eto, E henimu. Ruma ai eha dae kau, bena Iesu ese Petro e nanadaia, eto, Simona e, oi be dahaka o tomamu a? Tanobada pavapavadia ese tax monina natudia edia amo bae abia eiava idau taudia edia amo a? 26 Petro eto, Idau taudia edia amo. Iesu ma eto, Benaini, natudia vada bae noho kava. 27 Ḡau tamona, lalodia baita hahekwakwanaidia na garina, gohu aola, kimai ta ba tahoa dobi, bena baine rere dae guna gwarumena ba veria isi. Bena uduna ba marea haga, lalonai silver monina ta ba davaria. Bavabia, bena ba henidia ita raruosi ahuda.